ފީފާ ވޯލްޑް ކަޕް 2022ގެ ގްރޫޕް "ޑީ"ގައި ތޫނިސް ކުޅުނު ފަހުމެޗުން ދުނިޔޭގެ ޗެމްޕިއަން ފްރާންސް 1-0 އިން ބަލިކޮށްފިއެވެ. ނަމަވެސް، މި ގްރޫޕްގައި އޮސްޓްރޭލިއާއިން ޑެންމާކު ބަލިކުރުމުން، ތޫނިސްއަށް ވަނީ ގްރޫޕްގެ ދެވަނަ ޖާގަ ގެއްލި، މުބާރާތަށް އަލްވަދާއުކިޔާން ޖެހިފައެވެ.
އެޑިއުކޭޝަނަލް ސިޓީ ސްޓޭޑިއަމްގައި ކުޅުނު ފޯރިގަދަ މެޗުގައި، ތޫނިސްގެ ފަރާތުން ވާދަވެރި، ރަނގަޅު ކުޅުމެއް ފެނިގެންދިޔައެވެ. މެޗުގައި ފެނިގެންދިޔަ ހަމައެކަނި ލަނޑު، 58 ވަނަ މިނިޓްގައި ތޫނިސްއަށް ޖަހައިދިނީ ވަޚްބީ ޚަޒްރީއެވެ. މެޗުގެ އިތުރު ވަގުތުގައި އެންޓޮއިން ގްރީޒްމަން ތޫނިސްގެ ގޯލަށް ބޯޅަ ވައްދާލިނަމަވެސް، ވީއޭއާރްއިން ދެއްކީ އެއީ ލަނޑެއް ނޫންކަމަށެވެ.
މި ނަތީޖާއާއެކު، ކުޅުނު 3 މެޗުން 6 ޕޮއިންޓާއެކު ގްރޫޕްގެ އެއްވަނައިގައި ފްރާންސް 16އަށް ގޮސްފައިވާއިރު، ދެވަނަ ބުރުގައި އެޓީމު ވާދަކުރާން ޖެހޭނީ ޕޮލެންޑާ ދެކޮޅަށެވެ.
