ފީފާ ވޯލްޑް ކަޕް 2022ގެ ގްރޫޕް "ސީ"ގައި ސައުދީއަތުން 1-2 މެކްސިކޯ މޮޅުވިނަމަވެސް، ލަނޑުގެ ތަފާތުން، އެ ގްރޫޕްގައި ހިމެނޭ ޕޮލެންޑް ކުރި ހޯދުމުން މެކްސިކޯއަށް މުބާރާތަށް އަލްވަދާޢުކިޔާން ޖެހިއްޖެއެވެ.
މިއީ 1978ގެ ފަހުން، މެކްސިކޯ ވޯލްޑް ކަޕްގެ ގްރޫޕް ސްޓޭޖުން ކެޓި ފުރަތަމަ ފަހަރެވެ.
ލުސައިލް ސްޓޭޑިއަމްގައި ކުޅުނު، ފޯރިގަދަ ކުޅުމެއް ފެނިގެން ދިޔަ މެޗުގައި މެކްސިކޯއިން މޮޅަށް ކުޅެ ދެވަނަ ހާފްގައި ދެލަނޑުގެ ނެގިއެވެ. ފުރަތަމަ ލަނޑު ޖެހީ، 47 ވަނަ މިނިޓްގައި ހެންރީ މާޓީންއެވެ. އަދި 52 ވަނަ މިނިޓްގައި ލުއިސް ޗަވޭޒް ޖެހި ލަނޑާއެކު، އެވަގުތު ކުޅެމުން ދިޔަ އާޖެންޓީނާ 2-0 ޕޮލެންޑް މެޗުގެ ނަތީޖާއާއެކު، މެކްސިކޯއަށް ޕޮއިންޓާ ލަނޑުގެ ގޮތުންވެސް ޕޮލެންޑާ އެއްވަރުވިއެވެ. އަދި ތިންވަނަ ލަނޑެއް ޖަހާން 3 މިނިޓްގެ ވަގުތު ކޮޅެއް ލިބުނު ނަމަވެސް، މެކްސިކޯ ހިތްދަތިކޮށްލީ، ސާލިމް އަލް ދޮސާރީ ޖެހި ލަނޑުންނެވެ.
މި ނަތީޖާއާއެކު، މި ދެޓީމުވެސް، ގްރޫޕް ސްޓޭޖުން ކެޓީއެވެ. ގްރޫޕްގެ އެއްވަނަ ހޯދި އާޖެންޓީނާ ވާދަކުރާނީ، އޮސްޓްރޭލިއާއާއެވެ. އަދި ޕޮލެންޑް ވާދަކުރާނީ، ފްރާންސާއެވެ.
