ފީފާ ވޯލްޑް ކަޕް 2022ގެ ގްރޫޕް "އީ"ގައި، ވަރުގަދަ ސްޕޭނާ ދެކޮޅަށް ވާދަކޮށް، 2-1 ލަނޑުން ސްޕޭން ބަލިކޮށް، ގްރޫޕްގެ އެއްވަނަ ޓީމުގެ ގޮތުގައި ޖަޕާން ދެވަނަ ބުރަށް ގޮސްފިއެވެ. މިއީ ޖެހިޖެހިގެން ދެވަނަ ފަހަރަށް ދެވަނަ ބުރުން ޖަޕާނު ޖާގަ ހޯދި ފުރަތަމަ ފަހަރެވެ. އަދި 2002 ވަނަ އަހަރަށް ފަހު ގްރޫޕްގެ އެއްވަނަ ލިބުނު ފުރަތަމަ ފަހަރުވެސްމެއެވެ.
ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު ފޯރިގަދަ މެޗުގެ ފުރަތަމަ ހާފްގައި މޮޅަށް ކުޅެ، ނަތީޖާ ނެރުނީވެސް ސްޕޭނުންނެވެ. އެޓީމުން މެޗުގެ ލީޑުނެގީ 11 ވަނަ މިނިޓްގައި އަލްވާރޯ މޮރާޓާ ޖެހި ލަނޑުންނެވެ. ނަމަވެސް، ދެވަނަ ހާފްގައި ޖަޕާނުންވަނީ، ކުޅުން ވަރުގަދަކޮށް، ހާފްގެ ކުރީކޮޅުގައި ސްޕޭން ސިއްސުވާލައިފައެވެ. އެގޮތުން އެޓީމުގެ ފުރަތަމަ ލަނޑު 48 ވަނަ މިނިޓްގައި ރިޓްސޫޑޯން ޖަހައިދިންއިރު، އޭގެ 3 މިނިޓް ފަހުން އައޯ ޓަނަކާ ވަނީ ލަނޑެއް ޖަހައި ޖަޕާނަށް ލީޑު ނަގައިދީފައެވެ.
މި ނަތީޖާއާއެކު ސްޕޭން ބަލިވި ނަމަވެސް. ޕޮއިންޓުގެ ގޮތުން ޖަރުމަނާ އެއްވަރުވެ، ލަނޑުގެ ތަފާތުން ދެވަނަ ޓީމުގެ ގޮތުގައި ސްޕޭނަށް ވަނީ ދެވަނަ ބުރުން ޖާގަ ލިބިފައެވެ.
