ފީފާ ވޯލްޑް ކަޕް 2022ގެ ގްރޫޕް "ޖީ"ގައި، ސްވިޓްޒަލޭންޑް ކުޅުނު ފަހު މެޗުގައި ސާބިއާ އަތުން 3-2 ގެ ނަތީޖާއަކުން މޮޅުވެ ގްރޫޕްގެ ދެވަނަ ޓީމުގެ ގޮތުގައި ގަދަ 16އިން ޖާގަ ހޯދައިފިއެވެ.
ސްޓޭޑިއަމް 974ގައި ކުޅުނު ވާދަވެރި މެޗުގައި ފުރަތަމަ ލީޑުނެގީވެސް ސްވިސްއެވެ. 20 ވަނަ މިނިޓްގައި ޖެރޑާން ޝަގީރީ ޖެހި ލަނޑާއެކު ލީޑު ނަގާފައި ވަނިކޮށް 26 ވަނަ މިނިޓްގައި އެލެގްޒެންޑަރ މިޓްރޮވިޗް ވަނީ ސާބުންނަށް މެޗުގެ ނަތީޖާ ހަމަހަމަކޮށްދީފައެވެ. އަދި 35 ވަނަ މިނިޓްގައި ޑުސަން ފްލަހޮވިޗް ޖެހި ލަނޑާއެކު ސާބިއާ ލީޑުވެސް ނެގިއެވެ. ނަވަމެސް ދެވަނަ ފަހަރަށް މެޗުގެ ނަތީޖާ ހަމަހަމަކުރި ލަނޑު ސްވިސްއަށް ކާމިޔާބުކޮށްދިނީ 44 ވަނަ މިނިޓްގައި ބްރީލް އެމްބޯލޯއެވެ. އަދި 48 ވަނަ މިނިޓްގައި ރެމޯ ފްރެއުލަރ ޖެހި ލަނޑާއެކު ދެވަނަ ފަހަރަށް ސްވިޓްޒަލޭންޑުން ލީޑުނެގިއެވެ.
މި ނަތީޖާއާއެކު، 6 ޕޮއިންޓް ހޯދައި، ޕޮއިންޓުގެ ގޮތުން ބްރެޒިލްއާ ހަމަކޮށް، ލަނޑުގެ ތަފާތުން ގްރޫޕްގެ ދެވަނަ ޓީމުގެ ގޮތުގައި ސްވިޓްޒަލޭންޑް ވަނީ ދެވަނަބުރުން ޖާގަ ހޯދައިފައެވެ.
ދެވަނަ ބުރުގައި ބްރެޒިލް ވާދަކުރާނީ ދެކުނު ކޮރެއާއާއެވެ. ސްވިޓްޒަލޭންޑް ވާދަކުރާނީ ޕޯޗްގަލްއާއެވެ.
