ފީފާ ވޯލްޑް ކަޕް 2022ގެ ގަދަ 16ގެ ތިން ވަނަ މެޗުގައި ޕޮލެންޑުއަތުން 3-1ގެ ނަތީޖާއަކުން މޮޅުވެ ދުނިޔޭގެ ޗެމްޕިއަންސް ފްރާންސުން މިފަހަރުގެ މުބާރާތުގެ ކުއާޓަރގެ ޖާގައެއް ކަށަވަރުކޮށްފިއެވެ.
އަލް ޘުމާމާ ސްޓޭޑިއަމްގައި ކުޅުނު ފޯރިގަދަ މެޗުގެ 44 ވަނަ މިނިޓްގައި ފްރާންސުން ލީޑު ނެގި ލަނޑަކީ އެޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ގޮތުގައި އޮލިވިއާ ޖިރޫ ރެކޯޑް މުގުރާލި ލަނޑެވެ. މިއީ ފްރާންސަށް ޖިރޫ ކާމިޔާބުކޮށްދިން 52 ވަނަ ލަނޑެވެ. މި ރެކޯޑް ކުރީން އޮންނަނީ 51 ލަނޑާއެކު ތިއެރީ އޮންރީއަތުގައެވެ. ރެކޯޑާ އަރާހަމަކުރި ލަނޑުވެސް ޖިރޫ ކާމިޔާބުކުރީ މި ވޯލްޑް ކަޕްގައެވެ.
ފްރާންސްގެ އަނެއް ދެލަނޑު ކާމިޔާބުކުރީ ('74، '90+1) ކިލިއަން އެމްބާޕާއެވެ. އަދި ޕޮލެންޑުގެ ހަމަ އެކަނި ލަނޑު، މެޗު ނިމޭން ދަނިކޮށް އެޓީމަށް ލިބުނު ޕެނަލްޓީއަކުން، ފަހު ހާފުގެ އިތުރު ވަގުތުގެ 9 ވަނަ މިނިޓްގައި ކާމިޔާބުކުރީ ރޮބާޓް ލެވަންޑޮސްކީއެވެ.
ކުއާޓަރ ފައިނަލްގައި ފްރާންސް ވާދަކުރާން ޖެހޭނީ، ސެނަގޯލްއާ އިންގްލޭންޑް ވާދަކުރާ މެޗުން މޮޅުވާ ޓީމަކާއެވެ.
