ފީފާ ވޯލްޑް ކަޕް 2022ގެ ގަދަ 16ގެ 5 ވަނަ މެޗުގައި ޖަޕާނާދެކޮޅަށް ޕެނަލްޓީޖަހައިގެން ކުރިހޯދައި ކްރޮއޭޝިއާއިން މި މުބާރާތުގެ ކުއާޓަރ ފައިނަލްގެ ޖާގައެއް ކަށަވަރުކޮށްފިއެވެ.
އަލް ޖަނޫބު ސްޓޭޑިއަމްގައި ކުޅުނު ފޯރިގަދަ މެޗުގައި ދެޓީމުގެ ފަރާތުންވެސް ވާދަވެރި ރަނގަޅު ކުޅުމެއްފެނިގެން ދިޔައިރު، މެޗުގައި ފުރަތަމަ ހާފް ނިމެން ދަނިކޮށް، ފުރަތަމަ ލަނޑު ޖަހައި ކުރި ހޯދީ ޖަޕާނެވެ. 43 ވަނަ މިނިޓްގައި ޑައިޒެން މައިޑާ ޖެހި ލަނޑާއެކު ފުރަތަމަ ހާފް ނިމިގެން ދިޔަ ނަމަވެސް ދެވަނަ ހާފް ފަށައިގެން، 55 ވަނަ މިނިޓްގައި އިވާން ޕެރިސިޗް ޖެހި ލަނޑާއެކު މެޗުގެ ނަތީޖާ ހަމަހަމަވިއެވެ. އަދި ދެވަނަ ހާފް ނިމުނު އިރުވެސް 1-1ގެ ނަތީޖާއެއްގައި އޮތުމުން، އިތުރު 30 މިނިޓް ކުޅެގެންވެސް ނަތީޖާއަށް ބަދަލެއް ނައުމުން ނަތީޖާ ނެރެން ޖެހުނީ ޕެނަލްޓީ ޖަހައިގެންނެވެ. އެގޮތުން ޕެނަލްޓީގައި ކްރޮއޭޝިއާ ކުރިހޯދީ 3-1ގެ ނަތީޖާއަކުންނެވެ.
ކުއާޓަރގައި ކްރޮއޭޝިއާ ވާދަކުރާން ޖެހޭނީ، މިރޭ ދެކުނުކޮރެއާއާ ބްރެޒިލް ވާދަކުރާ މެޗުން މޮޅުވާ ޓީމަކާ ދެކޮޅަށެވެ.
