ފީފާ ވޯލްޑް ކަޕް 2022ގެ ގަދަ 16ގެ ފަހު މެޗުގައި، ކްރިސްޓިއާނޯ ރޮނާލްޑޯގެ ބަދަލުގައި ކުޅެންއެރި ގޮންޒާލޯ ރާމޯސްގެ ހެޓްރިކާއެކު 6-1 ތަފާތު ބޮޑު ނަތީޖާއަކުން ސްވިޓްޒަލޭންޑް ބަލިކޮށް ޕޯޗްގަލް މި މުބާރާތުގެ ކުއާޓަރފައިނަލުން ޖާގަ ހޯދައިފިއެވެ.
ލުސައިލް އައިކޮނިކް ސްޓޭޑިއަމްގައި ކުޅުނު ފޯރިގަދަ މެޗުގައި، ޕޯޗްގީޒް ޖެހި 6 ލަނޑުގެ ތެރޭން 3 ލަނޑު ('17، '51، '67) ކާމިޔާބުކުރީ ރާމޯސްއެވެ. އަނެއް ތިންލަނޑުގެ ތެރޭން އެއްލަނޑު 33 ވަނަ މިނިޓްގައި ޕެޕޭ، 55 ވަނަމިނިޓްގައި ރަފައެލް ގުއެރެއިރޯ އަދި އަނެއް ލަނޑު 90+2 ވަނަ މިނިޓްގައި ޖަހައި ދިނީ ރަފައެލް ލިއާއޯއެވެ.
މެޗްގައި ސްވިޓްޒަލޭންޑަށް ޖެހުނު ހަމަ އެކަނި ލަނޑު ކާމިޔާބުކުރީ 58 ވަނަ މިނިޓްގައި އަކާންޖީއެވެ.
ކުއާޓަރގައި ޕޯޗްގަލް ވާދަކުރާން ޖެހޭނީ ޕެނަލްޓީ ޖަހައިގެން ސްޕޭން ކަޓުވާލުމަށް ފަހު ގަދަ އަށަކުން ޖާގަހޯދި މޮރޮކޯއާއެވެ.
