ހަމަ ޔަގީނުންވެސް މިހާރު ގަތަރުގައި ކުރިއަށްދާ ދުނިޔޭގެ ފުޓްބޯޅަ މުބާރާތަކީ، އަރަބި-އިސްލާމީ ދުނިޔެއަށް ވަރަށް ޚާއްސަ މުބާރާތެކެވެ. މިއީ އަރަބި ފަސްގަނޑެއްގައި ބޭއްވޭ ފުރަތަމަ ވޯލްޑް ކަޕެވެ. އަދި އަރަބި ޤައުމުތަކުން ރަނގަޅު ނަތީޖާތަކެއްވެސް ހޯދި، އަދި ހޯދަމުންދާ ތާރީޚީ މުބާރާތެކެވެ.
މިފަހަރުގެ މުބާރާތުގެ ގަދަ 16އަށް ދަތުރުކުރި މޮރޮކޯ (މަޣްރިބް) ޓީމުން ދަނީ، ވިލާތު ޓީމުތަކުގެ ކުރިމަތީގައި ހިތްވަރުގަދަ ކުޅުމެއް ދައްކަމުންނެވެ. އެގޮތުން، ފީފާ ވޯލްޑް ކަޕް 2022ގެ ގަދަ 16ގެ 7 ވަނަ މެޗުގައި ދުނިޔޭގެ ފުޓްބޯޅައިގެ ގަދަފަދަ ބާރެއް ކަމަށްވާ ސްޕޭނާ ދެކޮޅަށް މޮރޮކޯއިން ވަނީ ވަރުގަދަ ދިފާޢީ ކުޅުމެއް ދައްކައިފައެވެ. އަދި މެޗުގެ ފުރިހަމަ ވަގުތާއި އިތުރު ވަގުތު ކުޅޭން މަޖުބޫރުވި މެޗުގެ ނަތީޖާ ނެރޭން ޖެހުނީ ޕެނަލްޓީ ޖަހައިގެންނެވެ.
ޕެނަލްޓީއަށް ތައްޔާރުވުމަށް މޮރޮކޯގެ ހުރިހާ ކުޅުންތެރީން އެއްވެ އަތުގުޅާލުމަށް ފަހު ހަރުއަޑުން ސޫރަތުލް ފާތިޙާ ކިޔެވިއެވެ. އަދި އެއަށް ފަހު، ޖެހި ޕެނަލްޓީގައި ސްޕޭން ބަލިކޮށް މޮރޮކޯއިން މި މުބާރާތުގެ ކުއާޓަރފައިނަލުން ޖާގަހޯދީ ފުޓްބޯޅައިގެ ދުނިޔެއަށް ސިހުން ގެނުވައިފައެވެ.
ދެންއޮތީ، މޮރޮކޯއަށް ވަރުގަދަ އިމްތިހާނެކެވެ. އަރިބީންނާއި އެފްރިކާގެ ނަން ފުޓްބޯޅައިގައި އެހެން ލެވެލަކަށް ގެންދިއުމަށެވެ. ކުރާން ޖެހޭ ކަމަކީ، ކުއާޓަރގައި ޕޯޗްގީޒުން ބަލިކުރުމެވެ.
