ދިވެހިރާއްޖޭގެ ވެރިކަން ހިންގުން ލާމަރުކަޒީވެގެން އަންނައިރު، ސަރުކާރު ޒިންމާދާރުކުރުމުގައި ނޫސްވެރީންގެ ޒިންމާތަކާއި ދައުރު ވަރަށް ބޮޑުކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
"ކައުންސިލްތައް ޖަވާބުދާރީ ކުރުވުމުގައި ނޫސްވެރިންގެ ދައުރު"ގެ ނަމުގައި ރާއްޖޭގެ ނޫސްތަކަށް އަމާޒުކޮށްގެން ހޯމް މިނިސްޓްރީން ކުރިއަށް ގެންދިޔަ ތަމްރީނު ޕްރޮގްރާމެއް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ކައުންސިލްތަކުގެ ދައުރު ފުޅާވަމުން އަންނައިރު ނޫސްވެރިން މެދުވެރިކޮށް ޖަވާބުދާރީ ކުރުވުމަކީ ކޮންމެހެން ކުރަންޖެހޭ ކަމެއް ކަމަށެވެ.
"ރާއްޖޭގެ ހިންގުމުގެ މުހިއްމު ބައެއް ލާމަރުކަޒީ ނިޒާމުގެ ދަށުން އަތޮޅުކައުންސިލްތަކާ ރަށުކައުންސިލްތަކަށް މަތިކުރެވިގެން ދާއިރު، ދައުލަތުގެ މާލިއްޔާތާއި އެނޫންވެސް ކަންތަކަށް ކައުންސިލްތަކުގެ ދައުރު ފުޅާވެގެން ދާއިރު، ޖަވާބުދާރީވުމާއި ޒިންމާދާރުކުރުމުގެ ކަންކަން، ކައުންސިލްތަކުގެ މައްޗަށް މިޑިއާތައް، ނޫސްވެރީން މެދުވެރިކޮށް ދިއުން އެއީ ކޮންމެހެން ކުރަން ޖެހޭކަމެއް،" މިނިސްޓަރު އިމްރާން ވިދާޅުވިއެވެ.
