ފީފާ ވޯލްޑް ކަޕް 2022ގެ ކުއާޓަރ ފައިނަލްސްގެ ފުރަތަމަ މެޗުގައި ދުނިޔޭގެ ފުޓްބޯޅައިގެ ޗެމްޕިއަންކަން ފަސް ފަހަރު ހޯދާފައިވާ ބްރެޒިލް އަތުން ޕެނަލްޓީ ޖަހައިގެން މޮޅުވެ މުބާރާތުގެ ސެމީގެ ފުރަތަމަ ޖާގަ ކްރޮއޭޝިއާއިން ހޯދައިފިއެވެ.
ދޯހާގެ އެޑިއުކޭޝަން ސިޓީ ސްޓޭޑިއަމްގައި ކުޅުނު ފޯރިގަދަ މެޗުގައި ދެޓީމުގެ ފަރާތުންވެސް ވާދަވެރި ކުޅުމެއް ފެނިގެން ދިޔައިރު، މެޗުގެ ފުރަތަމަ 90 މިނިޓް ނިމިގެން ދިޔައީ ލަނޑެއް ނުޖެހިއެވެ. އެގޮތުން، އިތުރު ވަގުތުގެ 30 މިނިޓްގެ ތެރޭން 105 ވަނަ މިނިޓްގައި ބެރެޒިލްގެ ތަރި ނޭމާ ކާމިޔާބުކޮށްދިން ހިތްގައިމު ލަނޑާއެކު، ބްރެޒިލުން ސެމީއާ ވަރަށް ބޮޑަށް ކައިރިއަށް ޖެހިލިއެވެ. ނަމަވެސް، ހިތްވަރާއެކު ދެގޮތެއް ނުވެ ކުޅެމުން އައި ކްރޮއޭޝިއާއިން ޓީމުން ވަނީ، 117 ވަނަ މިނިޓްގައި ބްރޫނޯ ޕެޓްކޮވިޗް ޖަހައިދިން ހިތްގައިމު ލަނޑުން ބްރެޒިލް ސިއްސުވާލައި، މެޗުގެ ނަތީޖާ ނެރެން ޕެނަލްޓީއާ ހަމައަށް ދުއްވާލައިފައެވެ.
ނަތީޖާ ނެރެން ޖެހި ޕެނަލްޓީގައި ކްރޮއޭޝިއާއިން ބްރެޒިލްގެ މައްޗަށް ކުރިހޯދީ، 4-2ގެ ނަތީޖާއަކުންނެވެ. ބްރެޒިލްގެ ފުރަތަމަ ޕެނަލްޓީ ކީޕަރު މަތަކުރި އިރު، އެޓީމުން ޖެހި ފަހު ޕެނަލްޓީގެ ހުރަހަކަށްވީ ގޯލް ދަނޑިއެވެ.
މި ނަތީޖާއާއެކު، ކްރޮއޭޝިއާއިން ސެމީގެ ޖާގައެއް ކަށަވަރު ކޮށްފައިވާއިރު، ސެމީގައި އެޓީމު ވާދަކުރާން ޖެހޭނީ މިރޭ އާޖެންޓީނާއާ ނެދަލޭންޑްސް ކުޅޭ މެޗުން މޮޅުވާ ޓީމަކާ ދެކޮޅަށެވެ.
