ބްރެޒިލްގެ ތަރި ނޭމާ ޖޫނިއަރ، ގައުމީ ޓީމަށް ކާމިޔާބުކުރި ލަނޑުގެ އަދަދު ބްރެޒިލްގެ ފުޓްބޯޅަ ލެޖެންޑް ޕެލޭ، ގައުމީ ޓީމަށް ޖަހައިދިން ލަނޑާ އެއްވަރުކޮށްފިއެވެ.
ވޯލްޑް ކަޕް 2022ގެ ކުއާޓަރ ފައިނަލްސްގެ ފުރަތަމަ މެޗުގެ 105 ވަނަ މިނިޓްގައި ކްރޮއޭޝިއާ ކޮޅަށް ނޭމާ ޖެހި ލަނޑަކީ، އޭނާ ގައުމީ ޓީމަށް ކާމިޔާބުކުރި 77 ވަނަ ލަނޑެވެ. މިއީ ބްރެޒިލް ޓީމާއެކު 3 ފަހަރު ވޯލްޑް ކަޕް ކާމިޔާބުކުރި ޕެލޭ ގައުމީ ޓީމަށް ޖެހިކަމަށް ފީފާގެ އޮފިޝަލް ރެކޯޑުތަކުން ދައްކާ އަދަދެވެ.
ފީފާއިން އެގޮތަށް ރެކޯޑުކުރި ކަމުގައި ވީ ނަމަވެސް، ބްރެޒިލްގެ ފުޓްބޯޅަ ފެޑެރޭޝަނުންވެސް އަދި ޕެލޭވެސް ގަބޫލުކުރާ ގޮތުގައި، ޕެލޭ ބްރެޒިލް ޓީމަށް ޖަހައިދިން ލަނޑުގެ އަދަދަކީ 95އެވެ. ޕެލޭ ރެކޯޑު ހަދާފައިވަނީ، 92 މެޗު ކުޅެގެންނެވެ. ނޭމާ، 77 ލަނޑު ޖަހާފައި މިވަނީ 124 މެޗުންނެވެ.
ދޯހާގެ އެޑިއުކޭޝަން ސިޓީ ސްޓޭޑިއަމްގައި މިރޭ ކުޅުނު މެޗުން ޕެނަލްޓީގައި ކްރޮއޭޝިއާއިން ބްރެޒިލްގެ މައްޗަށް ކުރިހޯދީ، 4-2ގެ ނަތީޖާއަކުންނެވެ. މި ނަތީޖާއާއެކު، ލަނޑުގެ ރެކޯޑު ހަމަހަމަކުރުމުގެ އުފަލުންވެސް ނޭމާވަނީ މަހްރޫމްވެފައެވެ.
