ފީފާ ވޯލްޑް ކަޕް 2022ގެ ކުއާޓަރ ފައިނަލްގައި އިންގްލޭންޑާ ފްރާންސް ބައްދަލުކުރި މެޗު، 2-1ގެ ނަތީޖާއަކުން ކާމިޔާބުކޮށް، މި މުބާރާތުގެ ސެމީ ފައިނަލްގެ ޖާގައެއް އެންމެ ފަހުގެ ދުނިޔޭގެ ޗެމްޕިއަނުން ހޯދައިފިއެވެ.
ގަތަރުގެ އަލް ބައިތު ސްޓޭޑިއަމްގައި ކުޅުނު ފޯރިގަދަ މެޗުގެ 17 ވަނަ މިނިޓްގައި ފްރާންސުން ލީޑުނެގިއެވެ. އެޓީމަށް ލަނޑު ޖަހައިދިނީ ޒުވާން މިޑްފީލްޑަރ އައުރެލިއެން ޗޫމޭނީއެވެ. މި ނަތީޖާއާއެކު ފުރަތަމަ ހާފް ނިމި ދެވަނަ ހާފް ފަށައިގެން 54 ވަނަ މިނިޓްގައި އިންގްލޭންޑުން ނަތީޖާ ހަމަހަމަކުރިއެވެ. އެޓީމަށް ލިބުނު ޕެނަލްޓީއަކުން މިލަނޑު އިންގްލޭންޑަށް ކާމިޔާބުކޮށްދިނީ ކެޕްޓަން ހެރީކޭންއެވެ. މި ލަނޑާއެކު ކޭން ގައުމީ ޓީމަށް ޖަހައިދިން ލަނޑުގެ އަދަދު ވަނީ، ވޭންރޫނީ ގާއިމްކޮށްފައިވާ 53 ލަނޑުގެ ރެކޯޑާ އަރައި ހަމަކޮށްފައެވެ.
މިނަތީޖާގައި އިނގިރޭސީންނަށް ހިފަހައްޓައި ނުލެވި، ދެވަނަ ފަހަރަށް ފްރާންސުން ލީޑު ނެގީ 78 ވަނަ މިނިޓްގައި އޮލީވިއާ ޖިރޫ ކާމިޔާބުކޮށްދިން ލަނޑުންނެވެ. ޖިރޫގެ ލަނޑަށްފަހު، މެޗު ނިމެންދަނިކޮށް، އިންގްލޭންޑަށް ނަތީޖާ އަނބުރާލުމަށް ލިބުނު ނަމަވަވެސް، ފަހު ވަގުތުގައި އިނގިރޭސީންނަށް ލިބުނު ޕެނަލްޓީ، ކޭން ފޮނުވާލީ ގޯލްގެ ހުރަސްދަނޑީގެ މަތީން ޖައްވުގެ ތެރެއަށެވެ.
އިންގްލޭންޑުގެ ހިތް ހަލާކުކޮށްލާފައި ސެމީން ޖާގަހޯދި ދުނިޔޭގެ ޗެމްޕިއަނުން ސެމީގައި ވާދަކުރާން ޖެހޭނީ ވަރުގަދަ ޕޯޗުގީޒުން ކަޓުވާލުމަށްފަހު ސެމީން ޖާގަހޯދި މޮރޮކޯއާ ދެކޮޅަށެވެ.
