ގަތަރުގައި މިހާރު ކުރިއަށްދާ ފީފާ ވޯލްޑްކަޕް 2022ގެ ސެމީ ފައިނަލްގެ މެޗުތަކާއި މުބާރާތުގެ ފައިނަލް މެޗުގައި ބޭނުން ކުރާނީ މި މުބާރާތުގައި މިހާތަނަށް ބޭނުންކުރަމުން އައި 'އަލް ރިހްލާ'ގެ ބަދަލުގައި 'އަލް ހިލްމް' ނަމަކަށް ކިޔާ ބޯޅައެއް ކަމަށް ފީފާއިން ބުނެފިއެވެ.
މިފަހަރުގެ ވޯލްޑް ކަަޕްގައި ބޭނުންކުރާ ފުޓްބޯޅަ އުފެއްދި އެޑިޑާސް ކުންފުނިން ބުނީ 'އަލް-ހިލްމް' ބޯޅައިގައި ވެސް 'އަހް ރިހްލާ' ބޯޅައެކޭ އެއްފަދައިން އޮފިޝަލުންނަށް އެހީތެރިވުމަށްޓަކައި ޓެކްނޯލޮޖީ ބޭނުންކޮށްފައި ވާނޭ ކަމަށެވެ.
ޢަރަބި ބަހުން "އަލް ރިހްލާ"ގެ މާނައަކީ ދަތުރެވެ. އަދި "އަލް ހިލްމް"ގެ މާނައަކީ ހުވަފެނެވެ.
މި މަހުގެ 14 ވަނަ ދުވަހު ކުޅޭން ހަމަޖެހިފައިވާ، މި މުބާރާތުގެ ސެމީ ފައިނަލްގެ އެއްމެޗުގައި ވާދަކުރާނީ އާޖެންޓީނާއާ ކްރޮއޭޝިއާއެވެ. އަދި އަނެއް މެޗުގައި ވާދަކުރާނީ ދުނިޔޭގެ އެންމެ ފަހުގެ ޗެމްޕިއަން ފްރާންސާއި މޮރޮކޯއެވެ.
