ކޮވިޑް19އިން ރައްކާތެރިވުމުގެ ގޮތުން އަވައްޓެރި ސްރީލަންކާގައި އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރޭން، އެގައުމަށް ކަނޑުގެ މަގުންނާއި ވައިގެމަގުން އެތެރިވާ ދަތުރުވެރީން ކޮވިޑް ވެކްސިން ޖަހާފައިވާކަން ކަށަވަރު ކުރާ ކާޑާ ނުލައި އެތެރެ ނުވެވޭގޮތަށް އޮތް އޮތުން އުވާލައިފިއެވެ.
ހުސްވި ހަފްތާގައި ލަންކާގެ ޑިރެކްޓަރ ޖެނެރަލް އޮފް ހެލްތު ސަރވިސަސް، ޑރ. އަސޭލާ ގުނަވަރދަނާ ވިދާޅުވީ، މިހާރު ލަންކާއަށް އެތެރެވުމަށްޓަކައި، ދަތުރުވެރީންގެ އަތުގައި ޕީސީއާރ ނެގެޓިވް ޓެސްޓް ނަތީޖާ، ނުވަތަ ރެޕިޑް އެންޓިޖަން ޓެސްޓް (އާރއޭޓީ) ސަރޓިފިކޭޓް އޮތުން ލާޒިމް ނޫން ކަމަށެވެ.
ލަންކާގައި އަނެއްކާވެސް ބޮޑެތި ލުއިތަކެއް ދީފައި މިވަނީ، ދުނިޔޭގެ ކޮވިޑް19ގެ ހާލަތަށް ބަލާފައިކަމަށް އެގައުމުން ބުނެއެވެ.
ލަންކާއަށް އެތެރެވުމަށް، މަތީގައި ބުނެވުނު ޓެސްޓްތައް ހަދާން ނުޖެހުނު ކަމުގައިވިޔަސް ލަންކާއިން އެހެން ގައުމުތަކަށް ދަތުރުކުރާ ފަރާތްތަކުން އެގައުމުތަކަށް ދަތުރުކުރުމަށް ކުރާންޖެހޭ ކަންކަން ކުރުން ލާޒިމް ވާނޭކަމަށްވެސް އެގައުމުން ބުނެއެވެ.
