ފީފާ ވޯލްޑް ކަޕް 2022ގެ ފައިނަލްގެ ފުރަތަމަ ޖާގަ، ލުކަ މޮޑްރިޗްގެ ކްރޮއޭޝިއާ ބަލިކޮށް ލިއޮނަލް މެސީގެ އާޖެންޓީނާއިން ހޯދައިފިއެވެ. މިއީ އާޖެންޓީނާ ވޯލްޑް ކަޕްގެ ފައިނަލަށް ދަތުރުކުރި 6 ވަނަ ފަހަރެވެ.
ލުސައިލް އައިކަނިކް ސްޓޭޑިއަމްގައި ކުޅުނު ފޯރިގަ ދަ މެޗުން އާޖެންޓީނާ މޮޅުވީ 3-0ގެ ނަތީޖާއަކުންނެވެ. މެޗުގައި އާޖެންޓީނާގެ ފުރަތަމަ ލަނޑު އެޓީމަށް ލިބުނު ޕެނަލްޓީއަކުން މެޗުގެ 34 ވަނަ މިނިޓްގައި ކާމިޔާބުކުރީ މެސީއެވެ. އަދި އަނެއް ދެލަނޑު ('39، '69) އެޓީމަށް ޖަހައިދިނީ ޖޫލިއަން އަލްވަރޭޒްއެވެ.
އާޖެންޓީނާ އެންމެ ފަހުން ވޯލްޑް ކަޕް ފައިނަލްގައި ކުޅެފައިވަނީ 2014 ވަނަ އަހަރުއެވެ. އެފަހަރު ފައިނަލްގައި އެޓީމު ވަނީ ޖަރުމަނު އަތުން ބަލިވެފައެވެ.
ލިއޮނަލް މެސީއަށް ފުޓްބޯޅައިގައި ނުލިބި އޮތް ތަށި، އުފުލައިލުމަށް ލިބިފައި އޮތް މި ފުރުސަތުގައި، އެޓީމު ވާދަކުރާން ޖެހޭނީ މާދަމާރޭ ފްރާންސާ މޮރޮކޯ ބައްދަލުކުރާ މެޗުން މޮޅުވާ ޓީމަކާއެވެ.
