ގަތަރުގައި މިހާރު ކުރިއަށްދާ ވޯލްޑް ކަޕް ފުޓްބޯޅަ މުބާރާތުގައި، ހައިރާންކުރުވަނިވި، ކުޅުމަކާއި ގަދަ ހިތްވަރުން ގިނަ ބައެއްގެ ލޯބި ހޯދާފައިވާ މޮރޮކޯއަތުން 2-0ގެ ނަތީޖާއަކުން މޮޅުވެ ދުނިޔޭގެ އެންމެ ފަހުގެ ފުޓްބޯޅަ ޗެމްޕިއަން ފްރާންސުން މި މުބާރާތުގެ ފައިނަލްގެ ދެވަނަ ޖާގަ ކަށަވަރުކޮށްފިއެވެ.
ފްރާންސް ވެގެން ގޮސްފައިމިވަނީ، 1962ގައި ބްރެޒިލުން ޖެހިޖެހިގެން ދެވަނަ ފަހަރަށް ވޯލްޑް ކަޕް ކާމިޔާބުކުރި ފަހުން، ޖެހިޖެހިގެން ދެވަނަ ފަހަރަށް ކާމިޔާބުކުރުމުގެ ފުރުސަތު ލިބުނު ފުރަތަމަ ޓީމަށެވެ.
އަލް ބައިތު ސްޓޭޑިއަމްގައި ކުޅުނު ފޯރިގަދަ ސެމީ ފައިނަލް މެޗުގައި ފްރާންސް ޓީމުން ކާމިޔާބުކުރި ފުރަތަމަ ލަނޑު ފެނިގެން ދިޔައީ މެޗުގެ 5 ވަނަ މިނިޓްގައެވެ. މޮރޮކޯ ޓީމް ރަނގަޅަށް މެޗުގެ ތެރެއަށް ނުވަދެވި އުޅެނިކޮށް، އެޓީމުގެ ޑިފެންސް އެރަރއެއްގެ ފައިދާނަގައި ފްރާންސަށް ލަނޑު ޖަހައިދިނީ ތިއޯ ހެނާންޑޭޒްއެވެ.
ފްރާންސްގެ ލަނޑަށްފަހު، މޮރޮކޯއިން އިތުރަށް ކުރިއަށް ޖެހި، ލަނޑު ޖަހާނޭ ރަނގަޅު ފުރުސަތުތަކެއް ތަނަވަސްކުރި ނަމަވެސް، އެޓީމަށް ފްރާންސްގެ ގޯލް ފޫއަޅުވައިލެވޭ ގޮތެއް ނުވިއެވެ. އަދި، އެގޮތުގައި ފަހު ހާފު ނިމެން ކައިރިވެފައި ވަނިކޮށް މޮރޮކޯއަށް އިތުރު ހިތްދަތިކަމެއް ގެނެސްދިނީ، ބަދަލު ކުޅުންތެރިއެއްގެ ގޮތުގައި ކުޅެންނުކުތް ފްރާންސްގެ ތަރި، ރެންޑަލް ކޯލޯ މުއާނީ، ޖެހި ލަނޑުގެ ސަބަބުންނެވެ. 79 ވަނަ މިނިޓްގައި މުއާނީ ލަނޑު ކާމިޔާބުކުރީ އޭނާ ކުޅެން އެރިތާ އެންމެ 44 ސިކުންތު ތެރޭގައެވެ. މިއީ، ވޯލްޑް ކަޕް މެޗެއްގައި ބަދަލުކުޅުންތެރިއަކު ކުޅެންނުކުމެ ކާމިޔާބުރި ތިންވަނައަށް އެންމެ އަވަސް ލަނޑެވެ.
ފައިނަލްގައި ފްރާންސް ވާދަކުރާން ޖެހޭނީ މި މުބާރާތް ކާމިޔާބުކުރުމަށް ފެންބޮވައިގެންފައިވާ، ދުނިޔޭގެ އެންމެ މޮޅުކުޅުންތެރިޔާ ލިއޮނަލް މެސީގެ ކައްޕިކަމުގެ ދަށުން ކުޅެމުން އަންނަ އާޖެންޓީނާއާ އެވެ.
