ފްރާންސްގެ ވޯލްޑް ކަޕް ޓީމުގެ ކޭމްތެރޭގައި އަރިދަފުސްރޯގާ ފެތުރެމުން ދާތީ އެޓީމުން، ރައްކާތެރިކަމުގެ ފިޔަވަޅުތައް ވަރުގަދަކޮށްފައި ވާކަމަށް، ކޯޗް ޑިޑިއޭ ޑިޝޯމް ބުނެފިއެވެ.
ބްރެޒިލަށް ފަހު، ޖެހިޖެހިގެން ދެވަނަ ފަހަރަށް ވޯލްޑް ކަޕް ތަށި ކާމިޔާބުކުރުމުގެ ފުރުސަތު މިހާރު ލިބިފައިވާ ފްރާންސުން، ސެމީ ފައިނަލްގައި 2-0އިން މޮރޮކޯ ބަލިކުރި މެޗަށް ފަހު، ކޯޗް ޑިޝޯމް ވަނީ، އޭނާގެ ޓީމުގެ ތެރޭގައި އަރިދަފުސްރޯގާ ފެތުރުމުގެ ބިރު ހީވެފައިވާތީ، ރޯގާގެ އަލާމާތްތައް ފެންނަ ކުޅުންތެރީން އެހެން ކުޅުންތެރީންނާ އެކަހެރިކުރަމުންދާ ކަމަށް ބުނެފައެވެ. އެގޮތުން، ގަދަ 16ގައި އިނގިރޭސީންނާ ދެކޮޅަށް ކުޅުނު މެޗަށްފަހު، ރޯގާ ޖެހުމުގެ ސަބަބުން، އެޓީމުގެ ފުރަތަމަ 11ގައި ހިމެނޭ، ޑަޔޮޓް އުޕަމެކާނޯއާއި އެޑްރިއެން ރަބިއަޓް އަދި ކިންގްސްލީ ކޯމަން ފަދަ ކުޅުންތެރީންނަށް ވަނީ ސެމީން ޖާގަ ގެއްލިފައެވެ.
އެހެންކަމުން މިއީ އިތުރަށް ވިސްނަން ޖެހޭ ކަމެއްކަމަށާއި، އަޅަންޖެހޭ ރައްކާތެރިކަމުގެ ފިޔަވަޅުތައް އަޅަމުންދާކަމަށް ކޯޗު ވަނީ ބުނެފައެވެ.
ފްރާންސަށް މިފަހަރުގެ ވޯލްޑް ކަޕް ކާމިޔާބުކުރެވިއްޖެ ނަމަ، ޖެހިޖެހިގެން ދެފަހަރަށް މި މުބާރާތް ކާމިޔާބުކޮށް ބްރެޒިލް ހަދާފައިވާ ރެކޯޑާ އަރާ ހަމަކުރެވޭއިރު، ކޯޗް ޑިޝޯމް ވެގެންދާނީ މި މުބާރާތް އެއްފަހަރަށް ވުރެ ގިނައިން ކާމިޔާބުކުރި ދެވަނަ ކޯޗަށެވެ. 1934 އަދި 1938ގައި ވޯލްޑް ކާމިޔާބުކޮށް، މިރެކޯޑް މިހާރު އޮތީ އިޓަލީގެ ކުރީގެ ކޯޗު ވިޓޯރިއޯ ޕޮޒޯއަތުގައެވެ.
