ވޯލްޑް ކަޕް 2022ގެ ސެމީ ފައިނަލްގައި އާޖެންޓީނާއާ ދެކޮޅަށް ކްރޮއޭޝިއާ ކުޅުނު މެޗުގެ ރެފްރީކަން ކުރި، އިޓަލީގެ ޑެނިއެލޭ އޮރސާޓޯއަކީ މިހާތަނަށް ދުށް އެންމެ ފީކަޅާ، އަދި ބޮޑު މުސީބާތެއްފަދަ ރެފްރީއެއްގެ ގޮތުގައި، ކްރޮއޭޝިއާގެ ކެޕްޓަން ލުކާ މޮޑްރިޗް ސިފަކޮށްފިއެވެ.
ސެމީ ފައިނަލްގައި، އާޖެންޓީނާއަތުން 3-0 އިން ކްރޮއޭޝިއާ ބަލިވި މެޗަށް ފަހު، މޮޑްރިޗް ބުނެފައިވަނީ، އޭނާއަކީ އާންމުކޮށް ރެފްރީންނާ މެދު ފާޑިކިޔާ މީހެއްވެސް ނޫންކަމަށާއި ނަމަވެސް، އޮރސާޓޯއާމެދު އެއްޗެއް ނުބުނެ ދޫކޮށްލުމަކީ ކުރެވޭނޭ ކަމެއް ނޫންކަމަށެވެ. އެގޮތުން، އޭނާ ބުނީ، އާޖެންޓީނާކޮޅަށް މެޗު އެނބުރޭން ދިމާވި ފުރަތަމަ ލަނޑު ކަމަށްވާ ޕެނަލްޓީއަކީ ދޭންޖެހޭ ޕެނަލްޓީއެއް ނޫންކަމަށާއި ނަމަވެސް، ރެފްރީގެ ނިންމުން އައީ ކިހިނެތްކަން އޭނާއަށް ނުވިސްނުނު ކަމަށެވެ.
"އެއީ މެޗުގެ އެންމެ މުޙިއްމު ވަގުތުކޮޅު. އޭނާ އަހަރެމެންނަށް ކޯނަރު ނުދިން، އެކަމަކު އެމީހުންނަށް ޕެނަލްޓީއެއް ދިނީ، އަހަރެން ގަބޫލެއްނުކުރަން އެއީ ދޭންޖެހޭ ޕެނަލްޓީއެއް ކަމަށް. ސަބަބަކީ އެކުޅުންތެރިޔާ ބޯޅަ ފޮނުވާލުމަށްފަހު އަހަރެމެންގެ ގޯލްކީޕަރު ގައިގައި ޖެހިގަތީ،" ގޯލް ކީޕަރު ޑޮމިނިކް ލިވަކޮވިޗް، ބްރެޒިލްގެ ހޫލިއަން އަލްވަރޭޒަށް ފައުލްކުރި ކަމަށް ނިންމައި ރެފްރީ ދިން ޕެނަލްޓީން ލިއޮނަލް މެސީ ލަނޑު ޖެހި ވަގުތުކޮޅު ސިފަކޮށްދެމުން މޮޑްރިޗް ބުންޏެވެ.
މިހާރު އުމުރުން 37 އަހަރުގެ މޮޑްރިކް ބުނީ، މުޅި މެޗު ބަދަލުވެގެން ދިޔައީ އެ ޕެނަލްޓީގެ ސަބަބުން ކަމަށެވެ.
"އަހަރެން މީ ރެފްރީންގެ ވާހަކަ ދައްކާ މީހެއްވެސް ނޫން، އެކަމަކު މިއަދު ރެފްރީގެ ވާހަކަ ނުދައްކައި ދޫކޮށްލެވޭކަށް ނެތް. އެއީ އަހަރެއް ދުށް އެންމެ ގޯސް ރެފްރީ. މިއަދު މެޗްގަ އެކަންޏެއް ނޫން. މީގެ ކުރީންވެސް އޭނާ ރެފްރީކަން ކުރި މެޗްތަކުގައި އަހަރެން ކުޅުނިން. އޭނާއާ ދޭތެރޭ ރަނގަޅު ހަނދާންތަކެއް ނެތް. އެއީ ބޮޑު މުސީބާތެއް،"
