މިއަދު ދިވެހިރާއްޖޭގެ މިސްކިތްތަކުގައި އިއްވި ހުކުރު ޚުތުބާގައި އަލިއަޅުވާލައިފައިވަނީ، ދުނިޔެއަށް ކުރިމަތިވާނޭ އެންމެ ނުބައި އަދި ބިރުވެރި އެއް ވަބާގެ މައްޗަށެވެ. އެއީ ރިޝްވަތުގެ ވަބާއެވެ. ޚުތުބާގައި ވާގޮތުން މިއަދު މި ކުޑަކުޑަ ދިވެހިރާއްޖޭގައި މި ނުބައިވަބާ ވަނީ ވަރަށް ރަނގަޅަށް ވަކިހިއްޕާލައި، އޭގެ ނޭދެވޭ އަސަރު މުޅި މުޖުތަމަޢުން ފެންނާން ފަށައިފިއެވެ.
ރިޝްވަތާއި ޚިޔާނާތާއި ފަސާދައަކީ، އޭގެ ސަބަބުން ކިތަންމެ ކުޑަ އަދި ކިތަންމެ ބޮޑު ވަރުގަދަ މުޖްތަމަޢެއްވެސް ކުޑަ ހިނދުކޮޅެއްގެ ތެރޭގައި ހަލާކުވެގެން ހިނގައިދާނޭ ފަދަ ނުރައްކާތެރި ވަބާއެއްކަން އިސްލާމްދީން ވަނީ ވަރަށް ސާފުކޮށް ބުނެދީފައެވެ. އެގޮތުން ޚުތުބާގައި ފާހަގަކޮށްފައިވާ ގޮތުގައި، މާތްﷲ ސުބްޙާނަހޫ ވަތަޢާލާ ވަނީ، އެއްބަޔަކު އަނެއްބައެއްގެ މުދާ ބާތިލް ގޮތުގައި ކެއުން ޙަރާމްކުރައްވައިފައެވެ. އަދި ރިޝްވަތު ޙަރާމްކުރައްވައި، ރިޝްވަތު ދޭމީހާއަށާއި، ރިޝްވަތު އުފުލާ މީހާއަށާއި، ރިޝްވަތު ބަލައިގަންނަ މީހާއަށްވެސް އެކަލާނގެ ލަޢުނަތްލަވާފައިވާކަން ހަނދާންކޮށްދީފައިވެއެވެ.
"މުސްލިމް އަޚުންނޭވެ! މުޅި ދުނިޔެއަށް ފެތުރިފައިވާ ނުރައްކާތެރި ބޮޑެތިވަބާތަކުގެ ތެރޭން ފިލުވައިލާން އެންމެ އުނދަގޫ އެއް ވަބާއަކީ ރިޝްވަތުގެ ވަބާއެވެ. ރިޝްވަތަކީ ހައްގުނޫން ގޮތަކަށް ކަމެއް ނުވަތަ އެއްޗެއް ލިބިގަތުމަށް ނުވަތަ ހޯދައިދިނުމަށް ދެވޭ ކޮންމެ އެއްޗެކެވެ." ގަވާއިދާ ޚިލާފަށް ކަންކަން ނިންމުމަށާއި އަދި ނުފޫޒުގެ ބޭނުންކޮށްގެން މަންފާއެއް ހޯދުމަށާއި އަދި ހައްގު ނޫންފަރާތަކަށް މަންފާއެއް ހޯދުމަށް ކުރެވޭ ކިތަންމެ ކުޑަކަމަކީވެސް ރިޝްވަތުކަން ބަޔާކޮށް މިއަދުގެ ޚުތުބާގައިވެއެވެ.
މީގެ އިތުރުން މިއަދު ރާއްޖޭގައި އެންމެ ބޮޑަށް ޢާންމުކޮށް އިވޭ އަޑުތައްކަމަށްވާ، ވަކިބަޔަކަށް މަންފާ ހޯދުމަށް، ވަކި ކަމެއް ހާސިލްކުރުމަށް ދައުލަތާއި ރައްޔިތުންގެ މުދަލަށް ޚިޔާނާތްވުންފަދަ ކަންކަން އެއީ ގައުމެއް ހަލާކުގެ ތެރެއަށް ވެއްޓޭނޭ އެންމެ ބޮޑެތި ވަބާތައްކަން ޚުތުބާގައި ފާހަގަކޮށްފައިވެއެވެ. ރިޝްވަތާއި ޚިޔާނާތުގެ ސަބަބުން، ގައުމުގެ ތަރައްގީގެ ދުވެލި މަޑުޖެހި، އަދުލު އިންސާފު ގެއްލި، އެތައްބަޔަކު ޙައްގުތަކުން މަހްރޫމްވެފައިވާކަން ފާހަގަކޮށްފައިވެއެވެ.
"މުސްލިމް އަޚުންނޭވެ!. އަހަރެމެންގެ މި ކުޑަކުޑަ މުޖްތަމަޢުވެސް މިވަނީ، މި ނުރައްކާތެރި ވަބާގައިޖެހިފައެވެ. މިއަދު ރިޝްވަތާއި، ނާޖާއިޒު ފައިދާއާއި، ކޮރަޕްޝަނާއި، ޚިޔާނާތުގެ ޢަމަލުތައް މުޖްތަމަޢުގައި ގިނަވެ، އެއީ ވަރަށް އާދައިގެ ކަމެއްގެ ގޮތުގައި، މުޖްތަމަޢުގެ ބައެއް މީހުން ވަނީދެކެން ފަށައިފައެވެ." ތިމާ ބޭނުންވާ ވަކިކަމެއް ޙާޞިލްކުރުމަށް ޤާނޫނުތަކާއި ޤަވާއިދުތައް މުގުރާލައި، މުއައްސަސާތަކަށް ތިމާގެ ޖީބުން ޚަރަދުކޮށް އެވެނިކަމެއް މިވެނިކަމެއް ޙާސިލުކުރީމޭ ބުނުމަކީވެސް ބައެއް މީހުންނަށް މިއަދު ބޮޑުކަމަކަށް ނުވާކަން ފާހަގަކޮށް ހުތުބާގައިވެއެވެ.
ރިޝްވަތުގެ ސަބަބުން، މުޖްތަމަޢުތެރޭގައި، ވައްކަމާއި، މާރާމާރީއާއި، ފޭރުމާއި، މަސްތުވާތަކެއްޗާއި، ޒިނޭއާއި މީހުންމެރުން ފަދަ އެންމެހައި ބިރުވެރި ނުބައި ޢަމަލުތައް ޢާންމުވެގެން ދެއެވެ. ވިސްނާލައިފިނަމަ މިފަދަ ނުބައި އެތަކެއް ޢަމަލުތަކެއް، އެތައް ބަޔަކު ފާޅުގައާއި ސިއްރިޔާތުގައި ކުރަމުންދާކަން، މިއަދު އަހަރެމެންގެ މި ކުޑަކުޑަ މުޖްތަމައުތެރޭން ކޮންމެ ދުވަހަކުހެން ފެނި، އަޑުއިވެމުންދެއެވެ. މި ބިރުވެރިކަން ޢާންމުވެއްޖެއެވެ.
ކޮންމެއަކަސް، ރިޝްވަތަކީ ކަނޑައެޅިގެން ޙަރާމް އެއްޗެއްކަން ކީރިތި ޤުރުއާނުންނާއި ރަސޫލާ ﷺ ގެ ޙަދީޘްފުޅުތަކުންވެސް ސާބިތުވާއިރު، މިއަދު ގައުމުގެ ވެރީންނާއި، ބާރުތައް ލިބިފައިވާ އެންމެހާ މުއައްސަސާތަކާއި ސިޔާސީ ފަރާތްތަކަށްވެސް މިނުބައި އާދަ ހުއްޓުވުމުގައި ނާކާމިޔާބުވަމުންދާނަމަ، މިއީ މުޅިރައްޔިތުން އެކަމާ ވިސްނައި، މިނޫންގޮތެއް ހޯދަން ޖެހިއްޖެކަން ޤަބޫލުކުރާން ޖެހޭ ޙާލަތެކެވެ. އެހެނީ ތިމާމެންގެ ޙާލަތު ބަދަލުކުރާން ތިމާމެން ނުކުޅެދިއްޖެނަމަ، އެއީ ބިރުވެރިކަމުގެ އިންތިހާއެވެ. ވިސްނައިފިކުރު ކުރާބަޔަކަށް ދުނިޔެމަތީގައި ކުރިމަތިވާ ކަންކަން ޢިބުރަތަކަށް ފުދެއެވެ.
