ފީފާ ވޯލްޑް ކަޕް 2022ގެ ތިން ވަނަ ޓީމު ހޮވާން ކުޅުނު މެޗުގައި މޮރޮކޯއަތުން 2-1ގެ ނަތީޖާއަކުން މޮޅުވެ، އެންމެ ފަހުގެ ރަނަރަޕް، ކްރޮއޭޝިއާއިން މި މުބާރާތުގެ 3 ވަނަ މަގާމު ހޯދައިފިއެވެ.
މިއީ 1991 ވަނަ އަހަރު މިނިވަންކަން ލިބުނު ފަހުން، 6 ފަހަރެއްގެ މަތިން ވޯލްޑް ކަޕްގައި ވާދަކުރި ކްރޮއޭޝިއާ ޓީމުން މި މުބާރާތުގެ 3 ވަނަ ހޯދި ދެވަނަ ފަހަރެވެ. މީގެ ކުރީން 1998 ވަނަ އަހަރު މުބާރާތުގެ 3 ވަނަ ހޯދުމަށްފަހު، 2018 ވަނަ އަހަރު ފްރާންސްގައި ބޭއްވި މުބާރާތުގެ ފައިނަލުގެ ފްރާންސާ ވާދަކޮށް އެޓީމު ބަލިވީއެވެ.
ޚަލީފާ އިންޓަރނޭޝަނަލް ސްޓޭޑިއަމްގައި ކުޅުނު ގަތަރު ވޯލްޑް ކަޕް2022ގެ ތިންވަނަ ހޮވި މެޗު ފެށިތާ އިރުކޮޅެއްގެ ތެރޭގައި ކްރޮއޭޝިއާއިން ލީޑުނެގިއެވެ. މެޗުގެ 7 ވަނަ މިނިޓްގައި ޖޮސްކޯ ވަރޑިއޮލް ލަނޑެއް ޖަހައި ކްރޮއޭޝިއާއަށް ލީޑު ނަގައިދިން ނަމަވެސް، ޖެހިގެން އައި މިނިޓްގައި އަޝްރަފް ދާރީ ކާމިޔާބުކުރި ލަނޑުން މޮރޮކޯ މެޗުގެ ނަތީޖާ ހަމަހަމަކުރިއެވެ.
ކްރޮއޭޝިއާ މި މެޗުން މޮޅުވި ލަނޑު، އެޓީމަށް ކާމިޔާބުކޮށްދިނީ ފުރަތަމަ ހާފް ނިމެންދަނިކޮށް އޮރސިޗެވެ. މިއީ، ވޯލްޑް ކަޕްގެ ތިން ވަނަ މަގާމު ވިލާތު ޓީމުތަކުން، ޖެހިޖެހިގެން ހޯދި 11 ވަނަ ފަހަރެވެ.
ފީފާ ވޯލްޑް ކަޕްގެ ތާރީޚްގައިވެސް ފުރަތަމަ ފަހަރަށް، އަރަބި/އެފްރިކާ ޓީމެއް ސެމީ ފައިނަލްގައި ވާދަކުރުމުގެ ޝަރަފް ހޯދި މޮރޮކޯ ޓީމުން މިފަހަރުގެ މުބާރާތުގެ ގްރޫޕް ސްޓޭޖްގައި އެޓީމު ކުޅުނު ފުރަތަމަ މެޗުގައިވެސް ވާދަކުރީ ކްރޮއޭޝީއާއާދެކޮޅަށެވެ. އެމެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ.
މުބާރާތުގެ ފައިނަލް މެޗް އޮންނާނީ މާދަމާރޭއެވެ. ފައިނަލްގައި ވާދަކުރާނީ އެންމެ ފަހުގެ ޗެމްޕިއަން ފްރާންސާއި، މީގެ ކުރީން ދެފަހަރު މިމުބާރާތް ކާމިޔާބުކޮށްފައިވާ އާޖެންޓީނާއެވެ.
